中環出更：榮譽院士細訴中大變化
中文大學尋日舉行第十五屆榮譽院士頒授典禮，表揚對大學同社會有卓越貢獻嘅傑出人士。今年獲頒榮銜嘅有周佩芳律師、北豐國際有限公司董事局主席范思浩、香港醫學專科學院主席李國棟、中文大學前副校長廖柏偉，以及「私人貸款之父」、亞洲聯合財務有限公司董事總經理長原彰弘。
廖柏偉化身集郵對象，不停有人向佢要求合照，除咗家人朋友，亦都有中大同事同徒弟。佢話由七十年代到今日，中大變化非常大，當年行走馬料水嘅火車一個鐘先得一班，而且只得柴油火車，過山窿時車箱更會漆黑一片。但佢好高興見到中大今日嘅發展，認為全靠同事努力，而佢亦好欣然有機會服務中大。
長原彰弘上台戴帽三次
長原彰弘就由八二年開始資助中大，佢直言呢三十四年間，中大發展非常急速，更話呢個係香港之福添！佢曾經喺台灣同日本讀書，比較三地大學時就話，台灣同日本側重本土，而香港相對國際化，學生來自五湖四海，多講英文，認為係香港嘅大學存有嘅優勢，所以佢一直着重資助學生交流活動。佢透露，早前已捐咗一百萬畀新亞嘅基金，仲明言公司上市後會加碼添！
不過，長原彰弘上台時就出現小插曲，皆因佢誤以為戴錯院士帽戴完又除，足足戴咗三次先搞掂引到哄堂大笑。佢事後解釋話上台好緊張，但都情有可原嘅，因為除咗太太同兒子到場，連居住台灣嘅朋友都非常畀面，親身到場祝賀，難怪長原彰弘如此緊張喇！
另外，卓妮尋日亦都見到「光纖之父」高錕，佢喺頒授典禮開始前就離開咗，但其實佢早早到場，係為咗同五位院士合照。患有腦退化症嘅高錕現時不良於行，說話亦有困難，但卓妮見佢就精神非常飽滿，仲滿面笑容添！
卓妮