政情：女神曾素麗 短髮玩划艇
沙田區議員曾素麗（阿Yen）因為外表標致、形象斯文，當選後一直被稱民主黨（白鴿黨）女神，阿Yen日前就上載咗一張划艇照，同平日形象斯文嘅佢大相逕庭，但仍然非常吸睛。我哋仲留意到阿Yen早排將長髮剪短，形象大變，唔通佢受咗乜嘢刺激？
方便清爽 想再剪短啲
阿Yen話將長髮剪短係想方便進行各種戶外活動，佢前日就首次嘗試划艇，多得同為沙田區議員嘅吳錦雄教路，都算成功。佢話划艇最大挑戰係划幾下雙手已經好攰，但攰唔會阻攔到佢繼續「同陽光玩遊戲」。佢仲話短髮又方便又清爽，嚟緊有意將頭髮再剪短少少添！女神咁做怕唔怕粉絲會流失呀？
