中環出更：葉榮開議辦 同EQ打對台
區議會新丁葉榮曾就開設議員辦事處與立法會議員葛珮帆（EQ）各執一詞，葉榮喺馬鞍山頌安邨嘅辦事處尋日開幕，同「手下敗將」EQ嘅辦事處只有一舖之隔，名副其實係冤家路窄兼打對台。尋日恭賀葉榮辦事處開幕嘅花牌，多到要擺埋過EQ辦事處嘅門口，唔知算唔算係示威呢？
身體殘障 無礙工作
包括張超雄同楊岳橋在內嘅多名立法會議員，都有嚟賀葉榮嘅辦事處開幕，仲有街坊跳舞助興。葉榮話呢個辦事處得來不易，總算喺眾多波折下成功開幕。作為首名「輪椅區議員」，佢認為身體殘障無礙區議員工作，因為議員辦事處本身規定要有無障礙通道同傷殘廁所，所以辦事處亦毋須為佢進行特別嘅改裝。
葉榮早前因為辦事處問題同EQ有爭執，今後又要做鄰居，怕唔怕撞口撞面會尷尬呢？葉榮話EQ落選區議員後仍霸住辦事處，要新當選嘅佢租用另一個地方，依家辦事處位置接近，更可以目凸顯EQ唔按指引。佢又話多得錦濤區區議員陳國強讓出呢個「好地方」，佢先可以同EQ打對台。
卓妮