中環出更：「金牛」陣撐賣旗 豪氣逼人
仁濟醫院早前舉行全港賣旗活動，董事局成員包括主席鄭承峰、副主席嚴徐玉珊同總理鮑誠業等人齊齊揹住旗袋，喺人來人往嘅荃灣港鐵站賣旗。買旗場面大家睇得多，途人通常投入幾蚊散銀或廿蚊紙幣表示心意，身兼仁濟義工團總團長嘅總理吳國榮就拎出一疊金牛，吸引一大班「見錢眼開」嘅總理們一擁而上，一張金牛換一個愛心貼紙，不消一分鐘成件衫即貼滿晒心心，場面好搞笑。唔怪得吳國榮笑稱，佢係嚟買旗唔係賣旗喎！
王賢訊帶囝囝做善事
仁濟副主席王賢訊（Vincent）亦帶埋大仔Eason現身，Vincent話太太Vincci啱啱生完細仔未夠一個月，Eason有些少呷醋，所以佢就帶Eason出嚟玩，順便感受喺街邊賣旗嘅滋味。身兼卓悅控股高層嘅仁濟總理鄧肇殷（Erica）亦唔怕烈日當空努力賣旗。Erica話佢公司寫字樓已搬入荃灣，可以話係荃灣人，所以今次都出動近五十名同事幫手做義工。
卓妮見工作人員好認真處理攞旗袋嘅程序，事關今年初曾發生有義工遺失十一個旗袋喺的士嘅事件。吳國榮話按經驗推算，平均每個旗袋大約有二百蚊，實際損失大約三千蚊，雖然金額唔大，但係佢哋對市民捐出嘅一分一毫都好重視。所以今次嚴陣以待，仲鼓勵義工搭車交番旗袋時玩吓自拍，萬一唔見旗袋都有啲線索搵番咁話。
卓妮