近年財務中介公司成行成市，借錢易過借火，乜嘢「毋須現身」、「易借易還」、「不成功不收費」，吹到天花龍鳳，其實世界上邊有咁多隻蛤乸隨街跳吖，有啲財務中介同大耳窿冇分別嘅咋，受害人一旦落疊，隨時連渣都冇得剩。
呢，話口未完，警方又搗破一間吸血中介公司，涉及騙款逾三百萬元。件事係咁嘅，兩名受害人上月底接獲中介公司電話，聲稱可以安排低息貸款，並以物業作抵押，簽好文件後，兩人分別獲借貸二百五十萬元及一百五十萬元，點知中介扣起大筆款項，話要再做債務重組，搵另一間財務公司借更低息嘅貸款，結果借款人實際落袋只有幾十萬元，懷疑受騙報警，警方拘捕一名中介公司職員。
其實，今次事件只係冰山一角咋。去年八月至今年三月，警方接獲逾六百宗涉及財務中介嘅投訴，當中近二百宗涉及刑事成分，受害人超過四百人，涉款高達三億二千萬元，都咪話唔誇張。吸血中介嘅行騙手法層出不窮，但萬騙不離其宗，無非利用受害人急需現金周轉，以「手續費」、「諮詢費」等名堂斂財，有受害人借四百萬元，實收只有一百零四元；有受害人拒絕借款，仍要支付數萬元諮詢費；有受害人甚至連層樓都被呃埋，搞到自殺身亡，你話吸血中介係咪害人不淺吖？
以前借貴利九出十三歸，被稱為吸血鬼，依家呢類財務中介公司有過之而無不及，分別係前者唔見得光，後者就光天化日下行騙。之所以搞成咁，皆因當局監管不力，法例漏洞多多，成立中介公司門檻極低，只需喺公司註冊處註冊，由於手續費唔係利息，不受《放債人條例》監管，難以被控「放高利貸」罪名，即使起訴都未必入罪，唔怪得吸血中介有恃無恐，愈來愈猖獗喇。
可能港府都知衰啩，聲稱要加強規管中介公司，違規甚至要吊銷牌照添。可惜吖，當局做嘢一味拖拖拉拉，研究復研究，諮詢復諮詢，唔知何年何月至可以落實，目前只能靠警方以詐騙罪名打擊，簡直嘥氣。道高一尺，魔高一丈，吸血中介最近改以「走鬼」方式經營，增加調查難度，受害人想追回損失仲難過登天。
香港騙徒橫行，電話騙案、投資騙案、貸款騙案、街頭騙案無日無之，全拜當局放任自流所賜，再咁落去，國際金融中心遲早淪為詐騙天堂都似。講到底，世上沒有免費午餐，市民最緊要提高警惕，唔好輕易相信花言巧語吖！