政情：八網難逃：林瑞麟衝出香港巡迴講道
曾主理政改事務嘅前政務司司長林瑞麟，喺一二年離開官場到英國牛津大學神學院進修返港後，絕少在公開場合亮相，非常低調，但原來佢喺外地相當高調，甚至舉行巡迴分享會添！眾所周知，林瑞麟係虔誠基督徒，熱衷於信仰活動，佢現於香港及亞洲地區在唔同嘅教會同機構自由講道，係現任國際護教協會RZIM（Ravi Zacharias International Ministries）亞洲區嘅特約講員。
話一○年通過政改係神迹
林瑞麟最新動向係將於六月下旬舉辦題為「從公僕到神僕」嘅加國巡迴生命見證分享會（圖），舉辦地點為多倫多、卡爾加里、埃德蒙頓及溫哥華，巡迴四個城市合共八場。顧名思義，這個題目必然會涉及他出任政制及內地事務局局長期間最爭議嘅政改方案。據稱，佢在港講道分享經歷時亦曾提及政改，形容二○一○年通過政改係神迹，指神向「眾人以為死嘅方案吹氣，令佢活過來。」
相信唔單止教徒，市民亦好想聽到林瑞麟為官嘅心路歷程，尤其當年被揶揄為「林D9」、「林公公」及「人肉錄音機」，唔知佢會否考慮在港舉辦類似分享會呢？
（互聯網）