政情：蔣麗芸生日倡青少「生涯規劃」
成日都聽到後生仔話「畀條路嚟行吓」，但讀書時又有無做好生涯規劃呢？立法會議員蔣麗芸（Ann）下周一生日，佢就話生日願望係搞好推廣生涯規劃工作，建議啲後生仔可以倣效德國做法，完成中學後唔好升讀大學，直接出社會工作。佢話，好多年輕人都唔知自己想做乜，如果中學畢業後工作一段時間，就會了解自己想做啲乜，好似德國嘅年輕人，普遍都係中學畢業後工作，之後再進修。
阿Ann話，自從做議員以來都想推廣好生涯規劃工作，同教育局都傾過好多次，可惜局方唔係好積極。為咗推動呢方面工作，佢已經捐咗幾十萬元畀香港教育學院，培養教師做好呢方面嘅工作。喺商界多年嘅阿Ann仲話，幾十萬元唔算多，只係想拋磚引玉啫。講咁多，咁阿Ann又係咪好滿意自己嘅生涯規劃呢？點知佢就話覺得自己從政得太遲，如果早啲入議會，拉布未咁嚴重，可以有多啲作為喎。