政情：阿王斥長毛假「哲古華拉」霸公屋

立法會尋日繼續審議《二○一六年撥款條例草案》，審議條例草案嘅會議已經先後三次因為長毛等人拉布點算人數而流會，阿王尋日開會前，就喺會議廳外拉起寫上「拉布徹底破產」嘅橫批，又舉起金鉸剪道具抗議拉布。阿王又揶揄經常着哲古華拉肖像T恤嘅長毛，近日已經少咗着哲古華拉T恤，質疑長毛係唔敢再着哲古華拉嘅衫，因為長毛拉布並非真正為咗市民同基層，係假嘅哲古華拉。

口角繼而動武 互相指罵
呢個時候，着黑色英文句子T恤嘅長毛由會議廳行出來，指自己件T恤嘅英文字句係「推翻暴政，可一可再」，仲反問阿王「你識唔識英文？」阿王就反擊話︰「你做真嘅哲古華拉，就唔好拉布！唔好嘥市民嘅血汗！唔好霸住公屋！」即刻將長毛秒殺。不過，兩人隨即由口角繼而肢體碰撞，不斷手指指，阿王更聲稱畀長毛拍打手上橫批同擊打胸膛，經一輪擾攘先至各自返回會議廳。

王：學過武功卸力 唔會報警

阿王話，好在佢「學過武功、卸咗力」，並未受傷，但就強烈譴責長毛嘅粗暴行為；而他亦唔會報警，因為覺得報警都係「嘥時間、無意思」，最重要都係確保立法會可以如期「剪布」。而被指「郁手郁腳」嘅長毛就無再回應霸住間公屋嘅批評，只係話自己成屋都係哲古華拉衫，阿王唔應該就衣着人身攻擊。

長毛作為立法會議員，每月申領九萬多元薪金，仍厚臉皮霸住間公屋，已多次受到各界抨擊，但依舊賴死唔搬。長毛更喺議會拉布成癮，阻礙議會議政同審批公帑，危害需要公帑扶助基層，難怪連阿王都叫大家要認清呢個假嘅哲古華拉喇。