中環出更：工業界彈性生產減浪費
香港工業總會（工總）旗下促進企業社會責任委員會第四屆「工業獻愛心」表揚計劃已開始接受報名，推動行業參與企業社會責任項目，包括提倡於生產前諗定點樣可以減低產品對社會嘅負面影響。委員會主席張益麟分享，近年佢哋採用新生產模式，好似幫歌手黎明製作演唱會紀念品時，每日評估翌日嘅產品需求，再即時生產，減少因賣剩而造成浪費。
張益麟話，過往一次過預先生產嘅模式不時造成社會問題或污染，因此應重新檢視產品同市場需求是否相符。喺新模式下，需要幾多就製造幾多，成本會高啲，但就減少咗多餘生產。好似今次黎明第一日演唱會取消，都可以留番第二日賣，就算真係取消晒咁多日演唱會，最多都係諗計清咗一日嘅貨，有人買唔到又可以即時加碼生產，彈性較大。
鄭文聰10年無加自己人工
本身從事環保工業嘅工總主席鄭文聰話，無論係社會企業責任或創造社會效益，最初都係會遇到困難，好似佢哋行業咁，由於唔想伙記擔心，試過低迷時寧願全年唔出糧畀自己，都堅持出糧畀伙記，又試過十年無加自己人工，後來生意先慢慢上軌道，但佢認為照顧員工感受同樣係企業責任嘅一種。
至於工總副主席郭振華就透露，歐盟近日有意修改衣物染料規格，降低物料中某些化學成分，對紡織及製衣業界都係一個挑戰，但香港咁多科研人才，換個角度又係新商機。
卓妮