上個月係前蘇聯切爾諾貝爾核電廠洩漏事故三十周年，有電視台訪問到當地旅遊嘅香港人，問佢做乜咁勇，唔驚影響健康咩？點知對方聳聳肩︰輻射香港都有喇，邊怕得咁多吖。諗落又係嘅，輻射威脅無處不在，唔使講到大亞灣核電廠咁遠，大家平時喺屋企可能已經吸埋吸埋唔少。
嗱，本報記者最近喺市面隨機抽驗十款不同產地嘅室內瓷磚樣本，結果發現全部樣本釋出嘅輻射量均超出本港平均室外輻射量，都咪話唔得人驚。原來唔少建材都溢出氡氣，而氡氣又會釋放輻射，據專家講，長期吸入帶有輻射嘅氡氣，會增加一至兩倍患肺癌風險，吸煙人士嘅風險更加高達三十倍添。
咪以為不惜工本買貴料就萬事大吉喎，檢測結果發現，輻射量最高嘅瓷磚竟然係售價較高、嚟自西班牙嘅來路貨，輻射量高出平均室外輻射量近一倍，以法例規定人體一年可接受嘅輻射上限計算，全日無間斷接觸嘅話，唔使一百日已經超標。至於其他九款瓷磚亦唔好得幾多，只有一款嘅輻射量屬可接受水平，問你怕未。
點解輻射瓷磚可以賣通街？講起都羞家，本港自詡國際大都會，居然一直冇法例規管建材嘅輻射水平，市民只能自己搵認可機構進行測試，落後人哋發達國家九條街。好似美國新澤西州咁吖，早就規定新居入伙前，發展商必須派專人量度室內輻射水平，消費者嘅健康絕對有保障。話時話，建材輻射量問題十幾年前已引起關注，亦有立法會議員要求立例規管，點知時任規劃地政局局長嘅財爺鬍鬚曾諗都唔諗就一口拒絕。寫網誌抽水就鬼咁積極，一叫佢做正經嘢就踢極都唔郁，簡直吹脹。
講番輻射危機，除咗建材安全無王管，全港超過三萬個手機發射站同樣危機四伏。你知喇，手機發射站釋放大量電磁波輻射，長期暴露分分鐘增加患癌風險，至弊係民急官唔急，本港電磁波輻射標準已經係十六年前嘅老古董，而且比內地寬鬆十倍，你話係咪抱殘守缺吖。有人形容香港已經淪為輻射港，真係一啲都冇誇張。
所以話，香港由福地變危地，講到尾都係因為港府無心無肺，官老爺得過且過，出咗事奉旨唔使孭鑊，即使鉛水風波咁大件事都可以好官我自為之，唔使問責咯喎，梗係做一日和尚撞一日鐘，多一事不如少一事喇！
一句講晒︰官僚靠得住，豬乸會上樹，想出入平安，惟有自求多福。聽講網上有售全套防輻射保護衣，大家係咪應該考慮買番件看門口呢？