睇吓月曆，果然「光陰似箭」，話咁快領導人下周二就會訪港三天，特區政府管治無能，自然月光光、心慌慌，忙得不亦樂乎，在領導人下榻酒店一帶、金鐘政府總部和立法會大樓對出，將路面上的地磚用膠水「黐死」。呢一個不尋常舉動，使人聯想到政府恐防旺角掟磚事件重演。
有議員指路面黐膠水，反映政府虛怯；事實上，一個「無橋、無膽、無能」嘅三無政府，連北大人到訪都騰雞成咁，完全違反林鄭所講嘅「官到無求膽自大」，唔通有人「官到有求膽自小」？誠如老朽之前所講，即使真係有人挖磚，都係好低層次嘅飛擲而已，訓練有素嘅香港警察，經過上次旺角黑夜嘅教訓，相信必吸取了教訓，有能力有對策去應付暴民嘅挖磚亂飛事件。再講啊，二○一一年李克強來港做港大慶祝創校一百周年嘅嘉賓，啲傳媒朋友都難埋佢身，示威人群就更加唔使講啦，今次北大人再光臨，相信方圓十里佢都未必睇到示威人群喇！
當年諸葛亮以亂石陣變化出八陣圖，令東吳大將陸遜入陣後難以得脫。杜甫有詩讚曰：功蓋三分國，名成八陣圖；江流石不轉，遺恨失吞吳。唉！如今之暴民一味精力多，哪有心思會以挖石排出「八陣圖」啊！所以政府好黐唔黐，走去黐石隙，搞到畀環保專家話礙去水，啲磚一旦爛鬼咗，將難以挖起，如此黐膠石，認真食古不化！
「力闢陰陽謀，戒絕假大空。人生不滿百，活在真實中。」呢幾句係內地作家邵燕祥嘅打油詩，贈給無靈魂政府最恰當。魯迅嘲諷中國文人對於人生、社會現象，向來沒有正視的勇氣；一遇到缺陷危機的千鈞一髮之際，總是閉上眼睛，閉上的眼睛便看見一切圓滿；於是無問題、無缺陷、無不平，也就無解決、無改革、無反抗。「三無」政府黐膠石後，就可以大覺瞓到天光嗎？