政情：李鎮強喜愛夜蒲Ladies Night
深水埗區議員李梓敬及東區區議員李鎮強早前為咗挑戰平等機會委員會，大搞Ladies Night（女士之夜），原來兩人自小就喜愛夜蒲女士之夜，李鎮強仲推介紐約有學生妹之夜添，又大爆父母都喺女士之夜先至相熟。咁講法如果當年無女士之夜，唔知佢仲出唔出到世呢？
李鎮強話，香港嘅女士之夜通常喺星期四舉行，美國就星期一至四都有，以幫補生意，而每晚仲會分主題，例如學生妹、OL、主婦等等，佢喺美國讀大學時，較多去學生妹之夜，由於當時無乜錢，參加女士之夜就唔使幫同行嘅女士畀錢喇，令男士們慳番唔少。佢又話，香港以前都有女士免費嘅茶舞之夜，佢父母就係由唔熟嘅同鄉，約埋一齊去跳舞跳到熟！
何顯明Party識老婆
九龍城區議員何顯明都笑笑口話，佢四十年前都有去龍記跳茶舞，嗰陣女士唔使畀錢，工廠妹都鍾意去，自己太太都係去party識嘅。李梓敬就話，自己中學、大學都有去女士之夜，但結婚後要避免夜蒲，聲稱要專一喎。