政情:三姝「易容」賣靚 教防美容陷阱

正所謂「你的樣子如何,你的命運也必如何」,喺呢個外表掛帥嘅年代,好多人愛靚唔愛命。工聯會立法會議員麥美娟、新舊「工聯小花」元朗區議員劉桂容同深水埗區議員陳穎欣早前又化妝、又set頭「易容」拍攝咗一系列嘅短片,用一個與平日不一樣嘅美顏,教消費者喺選用醫療美容服務時,應該如何保障自己嘅權益,同時批評政府對美容業監管不力,一直無成立專責部門處理。

麥美娟前晚喺個人facebook專頁上載咗一條拍攝花絮嘅片段,佢、劉桂容同陳穎欣喺片中都着上純白色嘅上衣,化上濃妝,在鏡頭前騷出她們最美嘅一面,差啲唔認得。佢哋仲抱住小狗,悠閒地訴說拍攝心情,看似係拍攝化妝品或時裝廣告,難道議員份工唔夠使,要「秘撈」搵外快?

扮廣告吸睛傳訊息

再細心聽佢哋嘅對話,果然係涉及美容,但並非推銷廣告,而係提醒一眾愛美嘅女士們避免跌入醫療美容陷阱。麥美娟表示,佢一直都有關注醫療美容服務質素參差,包括抽脂死人等問題,而近日聽到有建議認為以廣告拍攝嘅手法能夠容易帶出上述訊息,所以就聯同劉桂容同陳穎欣粉墨登場大變身。

麥美娟自稱係第一次參與同類拍攝,形容只係一班同事「柴娃娃」嘅小搞作。不過,講到妝容,佢亦難掩興奮之情,話化妝師係由劉桂容介紹,佢從來無試過同類嘅妝扮同髮型,所以非常期待拍攝效果。佢又話,三女子分別代表咗二十、三十、四十歲嘅女性,希望大家可以感受到「要靚又要命」嘅訊息,其實想靚有好多方法。

狠批欠缺專責部門

對於美容業風波不絕,特別係涉及醫療事故,麥美娟批評,歸根究柢係政府無成立一個部門專責監管美容業,現時凡涉及醫療美容嘅問題就係食物及衞生局處理,牽涉銷售手法嘅問題就係海關負責,不但監管分散,而且處理個案相當緩慢。佢話,喺政府未肯「對症下藥」前,惟有教消費者自保。面對呢個無能兼「冇神經」政府,市民真係自求多福好過喇!

第一手消息請下載on.cc東網iPhone/iPad/Android/Windows Phone Apps