立法會大會及財務委員會（財委會）積壓大量議程，早前秘書處已向各事務委員會查詢，係咪可以取消或更改七月初嘅會期，讓路畀大會及財委會加開會議。
尋日資訊科技及廣播事務委員會、教育事務委員會開會，分別決定取消及提早七月開會日期，睇嚟將會有愈來愈多事務委員會要讓路喇。
資訊科技及廣播事務委員會主席葛珮帆話，因為大會同財委會喺七月十六日前要處理唔少事項，商務及經濟發展局、創新及科技局都話無事項一定要喺七月提交討論，而原定討論嘅電子政府只係報告事項，所以建議取消原定七月十一日嘅會議，若有需要可以喺六月嘅會議增加討論項目及時間，未有議員反對建議。
教育事務委員會主席林大輝亦話，原定七月十一日嘅會議，改至七月二日星期六早上開會，唔知一班泛民主派議員行完七一遊行，會唔會咁早開會呢？
至於尋日資訊科技及廣播事務委員會會議，創科局資料顯示，去年有關科技罪案達六千八百多宗，涉及十八億元損失。
進出口界議員黃定光話，佢每月都會收到兩至三個冒認電話，冒認係政府部門、速遞、公安及中聯辦，形形色色都有，希望當局盡快制訂對策。政府資訊科技總監楊德斌話，政府資訊科技總監辦公室已成立政府應變小組，加強應對及防範數碼罪案意識。
卓妮