中環出更：李鋈麟行善 「粵」界反串「媽媽生」
東華三院日前搞咗個慈善粵劇晚會，一班董事局成員齊齊着唐裝撐場，部分成員同親友更換上戲服踏上台板，一嘗唱大戲籌款滋味。卓妮見到副主席李鋈麟今次又有突破，一身女裝反串扮演「媽媽生」，仲認真到喺條絲巾上噴埋香水，揚起條絲巾時入型入格，笑言能做慈善又可以娛樂大家，何樂而不為。
東華三院早前同鳴芝聲劇團一連兩日喺新光戲院大劇場公演《福星高照》及《洛神》兩劇目，為東華三院旗下檔案及歷史文化基金籌募經費。東華三院主席馬陳家歡女兒馬思齊亦粉墨登場，年紀輕輕嘅佢一啲都唔怯場，皆因平日間中都會表演唱歌或彈琴，加上今次有顧問馬志遠及總理趙怡嘅小朋友一同演出，所以特別興奮。
李曠怡第一次化濃妝
李鋈麟就話，之前試過着芭蕾舞裙跳天鵝湖，不過今次被安排飾演女角難度更高，但為做善事乜都唔介意喎！當日演出嘅仲有籌委會主席兼總理鄧明慧、副主席陳祖恒太太沈依紅、總理李曠怡、前總理曾楊淑貞等。鄧明慧話，本身有唱合唱團，但同唱大戲嘅技巧完全唔同，而佢每次負責籌款時都會選擇較多人有興趣嘅活動，好似嚟緊會搞個保齡球籌款活動喇。
至於總理李曠怡就係第一次化咁濃妝，話就算其他節日都好少作誇張或化妝打扮，淨係記得細個時攞媽咪支唇膏亂咁畫，又用嚟幫細佬化妝，搞到要食「藤條炆豬肉」。
卓妮