「差啲搞到我離婚、家變！」同為卅四歲的陳氏夫婦可說青梅竹馬，二人於十七、八歲時已相識，感情深厚，結婚至今六年，已育有一名女兒，羨煞旁人。豈料，正滿心喜悅準備迎接家中第二名寧馨兒，卻因仁安醫院化驗出錯，險拆散美好家庭。
陳先生說，太太當時由外母陪同產檢，接到仁安醫院的化驗報告，「醫生話感染愛滋病毒，太太晴天霹靂，明明自己清白，點解會有呢個不治之症？佢好擔心BB受到傳染，唔知點算好，日日以淚洗面」。他說，最初不知如何向長輩交代，惟有隱瞞，「唔想佢哋擔心」。
二人從未想過備受準媽媽追捧的仁安醫院會出錯，滿心歡喜迎接新生命到來，竟是噩夢的開始。陳先生憶述，當時夫妻間互相猜忌、指摘，「太太問係咪你（陳先生）惹我？係咪你喺出面搞三搞四？我同太太解釋咗好多次，又要誓神劈願，佢先相信我」，無妄之災險些釀成家變。
幸好威爾斯親王醫院的化驗報告還了陳太一個清白。陳先生說，得知事件真相後，大家終於鬆了一口氣，「雨過天青」，夫妻感情更勝從前。他現在回想等待化驗結果的時間，「幾辛苦」。他不滿仁安處理手法，當家屬提交威院的報告以證仁安醫院涉出錯，仁安只是更改該院的化驗報告及退回產檢費用，但拒絕再為太太預約分娩床位，他要求院方正視事件。本報記者