話說英法聯軍攻陷廣州，兩廣總督葉名琛既唔迎敵，亦唔投降，結果被俘到外國活活餓死，落得「不戰不和不守，不死不降不走」之譏。今日香港雖然未至於外敵入侵，但經濟前景空前嚴峻，一樣咁大鑊，最弊係港府同樣奉行「六不」主義，坐以待斃，你話係咪死得人多吖！
早排有調查顯示，如果經濟環境持續低迷，嚟緊一年將會有兩成中小企結業，話口未完，一間經營近三十年嘅羽絨服連鎖店宣布關門大吉，實行要錢唔要貨大平賣，掃貨人龍由旺角排到沙頭角咁滯，認真誇張。
嗱，呢啲咪所謂賤物鬥窮人囉。正如「東方報業民意調查」顯示，大部分受訪者擔心中小企倒閉加劇裁員潮，基層打工仔將會首當其衝。係人都知，本港中小企聘用超過一百三十萬人，兩成中小企執笠，即係數以十萬打工仔飯碗不保，都咪話唔大鑊。
一榮俱榮，一損俱損，零售業唔掂，四大支柱行業中嘅物流業同旅遊業都唔好得幾多。曾幾何時，本港貨櫃碼頭執世界牛耳，但近年好似滾水淥豬腸咁，愈做愈縮，由全球一哥跌至第六位，貨櫃吞吐量錄得連續二十一個月下跌。至於旅遊業，更加得番半條人命，啱啱結束嘅五一假期訪港旅客話就話止跌回升，可惜旺丁不旺財，旅客消費力同以前完全冇得揮。
之所以搞成咁，皆因香港自己唔爭氣。上述民調顯示，受訪者除咗批評社會政治化損害好客之都形象，亦有唔少人歸咎業界缺乏監管，港府喺旅遊基建方面無所作為。咁又係吖，社會七國咁亂，搞到人見人怕，呢個係事實，但景點單調乏味，吸引唔到回頭客，亦係不爭嘅事實。大家有眼見，鄰近地區吸客各出奇謀，唯獨香港一味食老本，唔係美食就係購物，故步自封，旅遊業有運行至奇喇！
屋漏偏逢連夜雨，隨着樓價持續下跌，負資產宗數由舊年第四季嘅九十五宗急增至今年首季嘅一千四百多宗，顯示資產質素有惡化迹象，點不知港府闊佬懶理唔在講，仲將樓市跌跌不休當正係政績咁大吹特吹添，其實樓市問題係雙刃劍，樓價過高，無殼蝸牛固然怨聲載道；樓價急跌，小業主一樣冇好日子過。當年樓蟹遍地，日日有人跳樓、燒炭嘅慘況，至今講起都一殼眼淚。
冇符喇，呢個政府實在太廢，啲官員唔係掛住官商勾結炒樓賺錢，就係無所事事胡混度日，邊有人關心經濟民生o架。法王路易十五話我死之後哪怕洪水滔天，港產官僚都係一擔擔嘅咋。