政情：鄭錦滿帶Gucci紙紮品請願
尋日係母親節，街上見到唔少乖仔乖女陪媽媽行下街，順便買埋禮物。但喺咁高興嘅日子，卓妮喺中環意大利名牌Gucci店外見到人稱「四眼哥哥」嘅本土派人士鄭錦滿等人帶住化寶桶同一堆紙紮手袋，聲稱係向Gucci請願，仲揚言話如果Gucci代表唔肯收，就會當場燒晒啲紙紮品。好彩最後代表收晒啲祭品，如果唔係就大吉利是喇！
搞「大龍鳳」爛尾
事件追溯到四月尾嘅時候，Gucci向六間紙紮舖發律師信，指佢哋所賣嘅紙紮祭品中，個商標同Gucci嘅類近，甚至一樣。
Gucci仲認為紙紮祭品侵犯咗其商標，同埋擔心公眾會造成混淆，所以出律師信要求佢哋停售同埋提供祭品嘅來源資料。不過Gucci嘅母公司開雲集團就喺上星期五再發聲明，向有關紙紮舖道歉，仲強調尊重香港嘅祭祀傳統文化。
其實喺Gucci發律師信之後，四眼哥哥就計劃發起行動作抗議，原本就打算喺香港每間Gucci店門口燒紙紮祭品。不過就喺佢透露計劃後，開雲集團就發聲明救火，所以佢場「大龍鳳」搞唔成，只係將請願信同由紙紮舖老闆送嘅祭品套裝交畀Gucci代表，之後就散Band嘞！