近月香港經濟明顯轉差，首先係訪港旅客減少，連帶少咗人買嘢同出街食嘢，多咗舖頭同食肆執笠。但喺另一方面嚟講，經濟放緩亦令唔少商界人士可以鬆一口氣，點解咁講呢？
本身代表總商會嘅行政會議成員兼立法會議員林健鋒（Jeffrey）尋日喺電台節目表示，銅鑼灣等旺區有愈嚟愈多吉舖，失業率亦重新開始上升，可能會致社會不穩，喺咁嘅情況下仲強推標準工時立法同取消強積金對沖，肯定會加重商界負擔，逐步侵蝕香港競爭力，尤其對中小企影響最大，認為政府必須正視。
不過話說回來，當有愈嚟愈多打工仔因公司執笠而被遣散，或被迫無償加班趕工跑數時，亦可能會激發更多市民要求取消對沖或立法規管工時。商界呢條苦肉計行唔行得通，真係好難講。