政情：沈祖堯暗寸學生只顧自己
中大校長沈祖堯日前發表網誌，提到早前喺日內瓦擔任一個國際獎項評審成員，大讚一眾候選人不以一己私利為先，利用知識、技術、人際網絡去達成目標，改變世界，最後更反問港人係咪太過注重自己同自己問題，忘記咗一己以外同埋點樣造福人群，難道佢暗寸近日啲學生只顧自己，太過自我呢？
沈祖堯喺網誌話大部分候選人都係受過大學教育嘅青年，佢哋推廣意念期間遇到重重困厄，但就冇退縮，着眼於世界形勢同需要，每日應用學到嘅知識應付難題，其中有候選人研發咗可裝配喺智能手機嘅簡單攝影機，拍下眼睛內部結構，以診斷白內障、糖尿同寄生蟲感染等引致失明嘅常見毛病，但冇以此嚟賺大錢，反而放棄高薪厚職到肯雅成立眼科診所助人。
指忘記造福人群
在文末，沈祖堯更反問港人係咪太過注重自己同自己嘅問題，忘記咗一己以外嘅世界同點樣造福人群，最後又引用咗兩位名人嘅句語，英國著名物理學家史蒂芬‧霍金：「無論生活有多艱難，總有一些你能做和做得來的事。」以及德國物理學家愛因斯坦：「生活就像踏單車：要保持平衡，就得不斷向前行。」難道佢暗寸近日香港學生只顧自己，太過自我而失衡？