政情：鬍鬚曾頂心杉 又同CY打對台
財政司司長曾俊華（鬍鬚曾）一向被指同特首梁振英（CY）貌合神離，唔單止係樓市政策方面，就連對香港足球隊取態都有天壤之別。鬍鬚曾尋日發表題為《體育經濟學》網誌，借支持十八場職業拳賽不敗嘅「神奇小子」曹星如（Rex），講體育其實係一門大生意，擺到明就係寸CY曾經講過「體育對經濟冇貢獻」嘅言論，簡直係頂心杉。
鬍鬚曾一直都有睇Rex比賽，喺舊年九月曾見證佢十八連勝之仗，上星期四晚仲趁Rex從菲律賓宿霧集訓返港，去拳館探班同打氣，支持佢今個星期六再勝一仗。
藉李城奪冠講歸屬感
鬍鬚曾又講番年輕習武時，手掌骨曾經斷過，要駁番，又話當晚喺拳館見到好多白領慕名而來學拳。講咁多嘢，其實鬍鬚曾係想講喺好多海外地區，體育係一門大生意，除咗運動員本身吸金力強，整條產業鏈亦帶動廣告宣傳、賽事統籌、體育用品，甚至飲食、旅遊同酒店等，可產生巨大嘅經濟效益。
跟住佢又重提之前喺網誌曾以香港比喻嘅英超冠軍李斯特城，話球隊因此可獲一點五億鎊（十六億六千萬港元）收入，增加當地民眾對社區歸屬感和凝聚力，更令數以百萬計海外球迷從此認識李城。佢希望更多商業機構能夠利用體育運動嘅強勁宣傳力量，更積極支持香港運動員同唔同運動賽事，一同發掘體育產業嘅無盡潛力。
二人已多次隔空互摑
話時話，之前香港足球隊喺世界盃亞洲區外圍賽對中國，CY唔敢講支持邊隊，只話當時在菲律賓，睇唔到比賽，但當時身處羅馬尼亞嘅鬍鬚曾，就特意喺facebook上載睇波相，擺明支持港隊，似係摑咗CY一巴。又例如之前鬍鬚曾對係咪有空間就樓市「減辣」，鬍鬚曾話「有需要會喺政策上作調整」，CY兩日後即刻封後門，表明辣招會「持之以恒」。佢哋係咁隔空打對台，實在好令人懷疑佢哋係咪同一個團隊呢？