中環出更：釋健釗爆做住持要佛學博士
寶蓮寺喺農曆四月初二至初八舉行一年一度嘅浴佛節，尋日舉行浴佛慶典儀式，但新方丈淨因大和尚就冇現身，由釋健釗長老代表寶蓮寺致詞，其後佢解釋，淨因大和尚喺遼寧省講學，活動由國家級單位主辦，人數同級數都比寶蓮寺今次嘅法會高，所以返唔到嚟，但初八正日就會返嚟，佢仲自爆落選之謎，話由淨因大和尚接任方丈，係因為佢擁有佛學博士學位。
早前方丈釋智慧傳出交棒，各界一直以為係釋健釗法師同釋宏通法師之爭，但最終由淨因大和尚接任。釋健釗長老估計公眾可能唔知來龍去脈，點解突然走咗個淨因大和尚出嚟，但佢建議大家留意寶蓮寺近年多次提到將來會發展文教，佢同釋智慧長老都唔係佛學博士，而淨因大和尚就係倫敦大學嘅佛學博士，亦擔任中國佛教協會轄下中國佛教文化研究所執行所長，淨因大和尚接任係合乎佢為寶蓮寺發展嘅身份，要發展更高層次嘅佛學課程，並非冇學位嘅人能夠勝任。
李慧琼怕囡囡太早拍拖
浴佛慶典撞正母親節，立法會議員李慧琼（Starry）話下晝會同囡囡食飯慶祝，依家仲等緊對方送親手整嘅禮物。
佢又提到囡囡已經十二歲，仲未有心理準備囡囡有日會同佢講拍拖，會觀察下囡囡有乜嘢變化，希望佢到大學先拍拖，但就唔會叫佢唔好咁早拍拖，怕愈叫愈麻煩喎！咁Starry嘅初戀係幾時？佢笑住話唔記得啦！
轉頭見到新界鄉議局前主席劉皇發孻女劉玉蓮同老公兼離島區議會副主席余漢坤（Randy），佢哋話每年都會同爸爸媽媽、哥哥劉業強等人，全家一齊食飯過節，今年都唔例外。卓妮偷偷地問過Randy送乜嘢畀太太，佢就緊張咁「口殊」我哋，似乎要畀個驚喜太太喎！
卓妮