古人話齋，禁而不止，則刑罰侮。港府有法不依，執法不嚴，放任牛鬼蛇神橫行無忌，禍害社會，搞到香港烏煙瘴氣，七國咁亂！
好似有「淫賤黎」之稱嘅壹傳媒老闆黎智英咁吖，被踢爆向反對派秘密捐款逾四千萬元，廉政公署係威係勢立案調查，開頭動作多多，又上門搜證，又約人飲咖啡，點知之後就無晒下文，眨吓眼就快兩年，當局仲未檢控任何人，問你服未。呢，尋日又有團體踩上廉署總部抗議，要求盡快徹查黑金案。佢哋話已收到八千個市民聯署支持，如果廉署繼續拖拖拉拉，唔排除每個月甚至每個星期都到廉署示威。
咁又係吖，黑金醜聞證據確鑿，無得抵賴，捐錢同收錢嘅都直認不諱，但當局查到依家仲係無聲無息，如果話當中無蠱惑，細路仔都唔信喇。正如有立法會議員質疑，唔通執法部門受到政治壓力，對外部勢力退避三舍，唔敢摸老虎屁股？
呢啲質疑唔係冇理由（口架），港府一向欺善怕惡，法律面前人人不平等，大家早就見怪不怪咯。係人都知，佔中行動禍港殃民，幾乎令香港萬劫不復，事後部分搞手被警方拘捕，部分人則高調自首，點知當局投鼠忌器，淨係向嗰啲無名小卒開刀，唔敢檢控主要搞手及幕後黑手。好簡單，淫賤黎被視為佔中幕後黑手及最大金主，到依家仲係逍遙法外，反而掟豬雜嘅市民就被判罪成，你話呢啲究竟係乜嘢法治？唔怪得有佔中搞手冷嘲熱諷，對於遲遲未被檢控感到「慚愧」喇。
有人就講得啱嘞，如果法律得唔到尊重，等於鼓勵人犯罪。正因為港府姑息養奸，牛鬼蛇神有恃無恐，香港至會愈來愈激進，愈來愈暴戾，連大學生都開口埋口「勇武抗爭」，都咪話唔恐怖。呢嗱，話口未完又嚟喇，有激進組織再次喺北區發起反水貨客活動，而且揀正五一勞動節，話到明唔排除傷及無辜，隨時又上演六國大封相都似。正所謂黃台之瓜，何堪再摘，本港旅遊及零售業步入寒冬，市道一片蕭條，連大財團都慨嘆「二十年來最差」，中小企業更加係苦苦掙扎，再畀激進組織咁搞法，想唔死都幾難！
講到底，近年本土及港獨思潮不斷蔓延，搞到雞犬不寧，其實根本就係港府一手造成，如果唔係港產官僚有法不依，養癰遺患，激進組織唔會愈來愈激，香港就唔會愈來愈亂喇。所以話，一個地方嘅興衰有迹可尋，以前香港政通人和，人人安居樂業，家陣港府施政混亂，政客無事生非，香港有乜法子唔沉淪吖！