近期樓市愈跌愈有，金管局尋日就公布今年首季負資產住宅按揭貸款達一千四百三十二宗，對比上一季嘅九十五宗，大升十四倍，難免令人憶起九七年亞洲金融風暴後，有唔少人上街抗議負資產，甚至有人頂唔順燒炭自殺。不過，金管局依然話千多宗個案情況唔算嚴重，而金管局總裁陳德霖亦都話樓市短期嘅變化，不足以明確判斷大市嘅趨勢，需要更多時間去觀察，先至確認樓市係咪已進入下行周期，意味當局未肯「減辣」放寬樓市措施。唔知係咪要再有人燒炭，先至認為事態嚴重呢？
