政情：工記蛇宴大揭秘

連搞百日 無公開發售門券

阿彪話，工記蛇宴通常每年十月搞到一月，足足一百日，名副其實「百日（蛇）宴」。不過，蛇宴從來唔會公開發售門券，相當神秘；而旺角蛇宴，大家都係之前食過或口耳相傳得知呢個傳說中嘅蛇宴。

每年八、九月開始，每日都會有大量會員致電查詢幾時開始訂位，好擔心訂唔到位，而公司、社團等更加係一圍圍預約，好快就會無位，即使係立法會議員，要訂位亦並非一定訂到，要預早留位，睇嚟喺工記做議員都無特權喎。

由於旺角蛇宴係飲食業職工總會主辦，阿彪話，大家普遍都會聯想到，從事飲食業一定最識食，所以認定旺角蛇宴係多個地區之中最好味，於是爭相訂位。事實上，飲食業職工總會唔少會員之前都係中式酒樓嘅師傅。而旺角蛇宴菜式當中，獨有一味馳名嘅寶鼎明珠湯，其他區無嘅，至於係咪真係咁好味，咁就唔知喇。

東南亞貨源 「蛇女」舞娛賓

其實舉辦百日蛇宴，都需要有大量蛇至得。阿彪透露，批蛇主要來自東南亞，包括泰國、印尼及越南等地，搵蛇舖幫手入貨，送到現場時，已經係蛇肉製成品，毋須再現場劏蛇，乾手淨腳，相當安全。據知蛇舖除咗幫手入貨外，間中仲會安排「蛇女」到蛇宴表演舞蛇娛賓添。所以話呢，搞「蛇齋餅糉」都唔係一件容易嘅事。