古人教落，過而不改，是謂過矣。港產官僚教而不善，錯而不改，唔怪得施政烏龍百出，醜聞不絕喇。
嗱，港珠澳大橋醜聞愈揭愈多，愈揭愈臭，嚴重延誤及超支不特止，仲搞到飄移再飄移，簡直成為國際笑話。早喺舊年四月，有內地工程師已經喺國家級期刊踢爆香港路政署為求趕工，將原本分層堆壓填海方式改為「直接吹砂」，大幅縮短填泥固結時間，結果對填海區外圍嘅鋼筒產生巨大側向推力，加大鋼筒圍堰嘅移動，影響整個圍堰嘅固結穩定性，搞到人工島不斷飄移。
講到呢度，大家終於知道點解港府對飄移問題一直遮遮掩掩，吞吞吐吐，因為佢哋就係罪魁禍首，梗係遮得就遮喇。港產官僚無知無覺，預測唔到人工島會出現移位，已經係一大失誤，內地工程師公開警告之後，佢哋依然置若罔聞，闊佬懶理，咁仲唔係錯上加錯？老實講，如果當日港府肯正視問題，採取措施亡羊補牢，就唔使搞成咁喇。
最離譜嘅係，飄移事件曝光之後，港產官僚仲要死撐，始終唔肯承認施工犯錯，你話係咪冥頑不靈，教而不善吖。正所謂，牽一髮動全身，隨着人工島工程因為飄移而一再延誤，屯門至赤鱲角連接路隧道工程亦受到牽連，唔止要臨時更改隧道着陸點嘅設計及建造方式，連隧道接駁到人工島嘅走線亦要修改，都咪話唔大鑊。
唔使問阿貴，港珠澳橋烏龍百出，問題多多，必然會進一步拖慢成個工程進度，隨時超支再超支，甚至可能掀起索償潮，都唔知點收科。正如有人話齋，如果證實人工島移位係當局出錯所致，而最終又導致工程延誤，承建商大條道理入禀索償，到時睇吓港府又點樣填氹，上次追加撥款千辛萬苦至獲立法會通過，今次想再叫政客開綠燈咯喎，睇怕仲難過登天都似。
所以話，一滴水可以睇世界，從港珠澳橋亂象多多，就知道港府幾咁無能。港產官僚渾渾噩噩，害咗香港不特止，仲連累埋珠海同澳門，明年通車嘅希望已凍過水，三年後可唔可以通車仲要望天打卦吖。老實講，香港經濟停滯不前，物流業每況愈下，由全球第一貨櫃港淪落到第六位，等到港珠澳橋姍姍來遲落成通車，可能得物無所用咯。有人擔心呢條花費巨資興建嘅大橋隨時變成大白象，唔係冇理由o架，如果冇足夠車流量支撐，想唔變成大白象都唔得喇。
都係孔子講得啱，朽木不可雕也。港珠澳橋係國家級重點工程，唔止得到中央祝福，而且得到中央資助，依家居然搞到唔湯唔水，騎虎難下，港產官僚真係害人害物！