政情：騎呢抗拉布 建制大合奏
泛民主派立法會議員就財政預算案「拉布」早已成為慣例，過去建制派為免變相助長拉布，面對泛民批評都係罵不還口，但今年立法會主席為預算案表決定下死線後，建制派就無後顧之憂進行大反擊。繼民建聯（民記）議員蔣麗芸前日狠批泛民「畀狗食咗個良心」後，其黨友陳鑑林（橄欖）尋日亦都以其人之道還治其人之身，會議期間要求響鐘點算開會法定人數以打斷泛民議員發言；而工聯會王國興（阿王）更唱改編洗腦歌，諷刺泛民拉布嘥公帑！
立會第N次流會
今年泛民議員同樣就預算案提出大量修正案，以及瘋狂要求響鐘點算開會法定人數方式拉布。不過，立法會主席曾鈺成今次一早已出招，表明下月十一日一定要投票，還為各政策範疇辯論時間設限，變相提早「剪布」，建制派自然無後顧之憂，可以暢所欲言兼大反擊。此外，過去泛民瘋狂點算開會人數，若建制派議員不留守會議廳，經常導致流會收場，但最近會議明顯看到建制派對流會不在乎，話口未完，尋日又再度流會收場。
話說前日發言期間因為人民力量議員陳志全（慢必）等人點算開會法定人數而三次被打斷發言嘅橄欖，在慢必發言期間突然要求響鐘點人數，成為今年預算案審議首個要求點人數嘅建制派議員，成功打斷慢必發言，搞到慢必都話驚大家錯失呢個「歷史性時刻」，而要「高度讚揚」橄欖。而呢次點人數就浪費咗十二分鐘，橄欖事後解釋，佢希望大眾了解無故點人數係不當行為。
同樣多次咬牙切齒鬧爆拉布議員嘅阿王就大玩二次創作，將近日網上熱爆洗腦歌《Side Angle Side》歌詞改為「拉布嘥拉布、嘥嘥嘥、嘥拉布嘥、拉布拉布嘥」。不過，歌詞改得有啲「hea」，仲要以五音不全為由，只係讀出歌詞，真係名副其實「呃like」喇！同場多名建制派議員亦都發言炮轟泛民拉布，令人忍無可忍。
但鬧還鬧，慢必就繼續瘋狂響鐘點人數，尋日全日就點咗十一次人數，嘥咗兩個半小時，夜晚臨散會半小時前仲要流會收場，係本年度第八次流會，加上原定今天開四小時會議，亦令本周損失四個半小時開會時間，真係「嘥嘥嘥」！