中環出更：陳岳鵬音準差 惡補煲冬瓜
唔少打工仔為咗升職，放工後都會去進修，令履歷好睇啲。卓妮有日遇到政制及內地事務局副局長陳岳鵬（Ronald），原來佢最近都開始再學普通話，唔通佢諗住更上一層樓？其實Ronald係去咗港大專業進修學院報讀為期九個月嘅課程，主要係因為依家任職嘅政策局，周不時都要同內地官員接觸交流。
上堂兼考試
Ronald話，雖然佢小學同中學都有學普通話，聆聽方面無乜問題，但始終唔係內地人，講普通話時嘅音調唔標準，擔心對方會有所誤會，所以報讀課程，希望改善音準。
現時Ronald每逢星期一放工後，都會上堂兩至三小時，都咪話唔忙。讀完呢個課程，再銜接普通話證書課程，就可以考國家普通話評核試，相信在日常溝通應用已綽綽有餘。Ronald係史丹福大學碩士，咁有冇興趣讀埋博士？佢就話諗都無諗，依家忙到咁，真係應付唔嚟喎。
卓妮