「遠水救近火」大家就聽得多，「軟水救大火」你又聽過未？唔係講笑o架，怪事年年有，今年特別多。
話說前日灣仔一幢舊樓發生三級火警，消防處接報後出動十六輛消防車及六輛救護車，超過一百名前線人員參與救援，係就係夠晒大陣仗，可惜虛有其表，睇得唔打得。好似消防員架設雲梯射水及拖喉上樓灌救咁吖，竟然因為水壓不穩，射水軟弱無力，直情好似淋花咁，卒之要臨時搵街井撲水救火，你話係咪笑話吖。
更離譜嘅係，消防喉居然穿窿漏水，水花四濺，消防員焗住要「瞓身」攬喉防漏，都唔知幾狼狽；加上雲梯高度不足，水柱未能射入起火單位，更加搞到踢晒腳。結果火勢迅速蔓延至樓下單位，足足花咗九十分鐘至將大火救熄，唔怪得住客及街坊噓聲四起，批評消防無能。老實講，今次好彩冇搞出人命咋，否則呢隻鑊都唔知點樣孭。
難為消防官僚仲喺度死撐，一方面承認有八條消防喉破裂，另一方面強調唔影響救援，又話喺街井取水係因為大廈水壓不穩，已要求大廈立案法團跟進，並要求水務署加大街井水壓喎。
喂，工欲善其事，必先利其器，唔通消防處連咁簡單嘅道理都唔識？消防喉千瘡百孔，同攞市民安全較飛有乜分別吖？最搞笑嘅係，水務署聲稱消防救火期間水壓一直正常，並無收到加大水壓嘅要求，當堂踢爆消防處講大話；而大廈立案法團主席亦指去年初完成大廈維修後，曾多次主動聯絡消防處跟進消防裝置係咪符合規定，點知消防處拖拖拉拉，家陣出咗事就推卸責任，簡直豈有此理！
講開又講，消防處一向醜聞多多，今次救火烏龍百出一啲都唔出奇。正如資深消防員話齋，高層冇心冇肺，一味諗縮數購買平價喉，加上維修不足，前線消防員被迫以「問題喉」上陣，結果咪搞成咁囉，穿窿漏水仲係其次，萬一喉管突然爆裂，隨時傷及消防員都似。仲有吖，之前消防處斥巨資購入新流動指揮車，點知車身居然超出法定重量而出唔到街，問你服未。所以話，消防處管理層淨係識得閉門造車，應慳唔慳，應使唔使，唔止不負責任，根本就係草菅人命。
正所謂，衰開有條路，審計署尋日發表報告踢爆消防處三個Apps形同虛設，首年預計有二十五萬人瀏覽，實際只有四萬幾人次，連五分一都唔夠，簡直嘥氣。大事做不到，小事做不好，咪就係消防官僚嘅最大特色囉，市民旨意佢哋救火救人，不如自求多福好過！