立法會拉布同流會漸變常態，情況蔓延到區議會已經唔係新聞，但估唔到向來氣氛相對和諧嘅灣仔區議會前晚都突然因為會議人數不足流會收場，但當區區議員未有將矛盾指向「對家」，而係批評政府部門恃住灣仔區議會氣氛和諧，容易啲通過議案，對區議員嘅提問「交行貨」，結果會議拖到夜晚七點幾宣布流會。既然議會氣氛咁「和諧」，又點怪得部門吖，唔知呢啲係咪叫「食得鹹魚抵得渴」呢？
建制派人數完全壓倒泛民主派嘅灣仔區議會，其轄下發展、規劃及交通委員會前日開會，我哋聽聞委員會討論運輸署提交有關該區年度巴士路線計劃議程時，多名議員不滿署方同巴士公司準備不足，對議員提問都敷衍了事，激到當區區議員李文龍、林偉文、楊雪盈等不停追問，拖至夜晚七點幾「夠鐘」表決，林偉文繼續發言，加上唔少議員夜晚要處理地區事務而要提早離場，最終因法定人數不足流會收場，流會一刻得番五名議員及增選委員王政芝。