政情：嫻姐「金雞獨立」拉傷腰腿
激進泛民主派在財政預算案辯論期間瘋狂點算開會法定人數「拉布」，一班議員為防流會而在立法會大樓內疲於奔命，惟工聯會陳婉嫻尋日下午已經「頂唔順」率先離開。事緣嫻姐日前做瑜伽招式「金雞獨立」拉傷咗腰腿，脊醫指她事前無做熱身運動，所以容易令肌肉受損。其實嫻姐年紀已經唔輕，做呢類高難度動作前唔做足熱身，一旦拉傷手尾可能會好長。
麥美娟戲稱幫手相睇
嫻姐尋日下午在同屬工聯會嘅麥美娟攙扶下離開會議廳，雖然嫻姐扭傷腰腿，但仍向記者示範「金雞獨立」招式。佢話今日要再到脊醫覆診先返立法會開會，仲話如果尋日萬一流會，缺席可以入埋佢數喎。嫻姐話，佢擅於各種運動，包括游水、乒乓球、籃球和跳舞，以前踩單車都會風馳電掣，本來有照片想同大家分享，可惜遺失咗呢張珍貴照片。
麥美娟在旁話，工會內唔少人都識得跳舞，又笑笑口話早前攞咗嫻姐踩單車張相去幫嫻姐相睇，所以唔見咗喎。嫻姐都咁玩，真係大膽囉。