中環出更：長毛立會玩潑墨 再捱罰款
社民連立法會議員梁國雄（長毛）經常喺立法會會議上抗議，約四年前佢就試過喺會議廳放氣球表達不滿，之後仲被秘書處罰款過萬元清理氣球，最近佢又再次被罰。立法會行政管理委員會（行管會）尋日向長毛發信，追討佢上月在財務委員會會議上向主席台潑墨水及拋擲物品嘅損失，要求佢支付四千八百元，作為清洗或更換被弄污物品嘅費用。
長毛喺上月十一日嘅財委會會議上向主席台潑墨水，搞到部分秘書處職員嘅制服、個人物品及會議室嘅地氈都被墨水整到污糟晒。長毛翌日再將兩本書及一個半滿嘅塑膠飲料瓶擲向財委會主席台，差啲就擊中代主席陳鑑林（橄欖）及隔籬嘅職員。行管會極度關注長毛嘅行為，可能令議員和職員受傷及感到人身安全受威脅，所以決定向長毛作出警告及追討罰款。
行為被指「唔要得」
長毛回應話如果因為佢嘅示威行為令秘書處出現額外支出，佢願意支付，但認為議會抗議是會議一部分，而清潔係職員嘅日常工作，今次要佢支付開支並不合理，佢打算同主席曾鈺成商討。橄欖形容當日長毛嘅行為「唔要得」，擔心萬一有人潑油漆或腐蝕性液體，影響更大，認為可發出更嚴厲警告，以防同類事件再發生。
卓妮