中環出更：「仁」心不息 鄧錦雄再做主席
城中六大慈善團體陸續舉行換屆就職典禮，早前輪到仁愛堂假洲際酒店舉行，由新主席鄧錦雄接替原主席史顏景蓮做掌舵人。做過仁濟醫院主席嘅鄧錦雄今次榮升仁愛堂主席，成為城中罕有做過兩個唔同善團主席嘅人，認真唔簡單。難怪當日好多慈善界名人前去捧場，平時好少出席公開場合嘅鄧太楊崇香亦現身支持。
鄧錦雄笑稱，當年加入仁愛堂有段古，事關佢嘅好兄弟圓玄學院主席陳國超時任仁愛堂副主席，但陳國超將接任健康快車主席，於是就叫佢接力加入仁愛堂喎！
曹貴子瞓身籌款
瞓身為兩個善團做善事嘅仲有仁愛堂副主席曹貴子，亦係今屆保良局總理。咪以為掛吓名容易，查實曹貴子好瞓身，當日便獲頒「最高籌款獎」季軍。同場亦頒發「全年贊助人經募最高籌款獎」，仁愛堂副主席羅台秦獲得季軍，冠軍當然係史顏景蓮喇。
曹貴子笑笑口話，佢間醫療集團已交畀專業團隊打理，自己則專心做善事，仲有十幾位同事全力支援佢做公益，所以仍有餘力於去年創辦網上募捐平台「意贈慈善基金」，將各機構轉介嘅受助個案放上網，隨時接受市民捐款。呢個突破傳統嘅籌款模式好受歡迎，至今已籌得一千九百多萬元。
講番就職禮，仁愛堂董事局一向多靚女，喺城中善團出晒名。不過，今屆董事局廿九人之中，男士竟然佔廿二位，都算扭轉咗局勢。其中前主席陳鄭玉而丈夫陳鑑光都加入做新丁總理，場面好熱鬧。
卓妮