話說香港開埠初期治安不靖，經常有強盜打家劫舍，新界居民為求自保，先後組織「更練團」維持治安。後來社會各界亦紛紛要求港府批准成立類似組織，保護市民生命財產，結果就出現「團防局」。估唔到風水輪流轉，百幾年後嘅今日居然歷史重演，更練團隨時重出江湖，都唔知可悲定可笑。
係咁嘅，近年假難民大舉入侵香港，罪案無日無之，搞到七國咁亂，人心惶惶。尋日凌晨之嘛，一名印度商人喺尖沙咀街頭遭南亞兵團持刀箍頸，搶去廿幾萬元鑽飾不特止，仲被打傷添。見微知著，假難民遍地開花，尖沙咀固然淪為九反之地，元朗更加成為重災區，今年一月至今咋，短短三個幾月該區已發生三十六宗涉及假難民嘅罪案，同油尖旺區簡直有得揮。
遠嘅唔講，近日就有幾單罪案，包括女街坊被當街搶去名牌手袋、男途人被爆樽扑頭搶手機，同埋南亞兵團「鬼打鬼」內訌毆鬥等等，居民惶惶不可終日。最離譜嘅係，一名七旬阿伯喺有「南亞公園」之稱嘅元朗水車館街遊樂場，因為出言阻止一名南亞漢向街坊索取煙仔，竟然被對方用拐杖毒打，用鐮刀恐嚇，然後再搶去剪指甲嘅剪刀施襲，阿伯被打到遍體鱗傷，倒地不起。
喂，只係為咗一支煙仔啫，南亞漢對一名老人家出手狠毒，招招攞命，仲有冇再兇殘啲吖。正如阿伯話齋，公園唔畀食煙，自己只不過好心提醒，咁都要畀人毒打，仲成世界嘅。冇計喇，假難民無法無天，係人都怕怕。早前有元朗居民倡議組織自衞隊，近日亦有區議員提議組織更練團，再咁落去，香港遲早回到百幾年前都似。
正所謂 ，有因必有果，元朗之所以搞成咁，主要因為港府無知無覺無神經。係人都知，元朗同深圳地理位置接近，早就成為南亞人蛇偷渡及聚居熱點，咁多年來傳媒不斷揭發亂象，居民亦不斷提醒港府正視問題，可惜港產官僚一於當耳邊風，話就話要檢討機制堵塞漏洞，但拖拖拉拉，遲遲未有動作。元朗警區仲離譜，麻鷹唔管管雞仔，寧願花費大量人力掃黃，亦唔願意剷除假難民呢個治安毒瘤，唔怪得有人質疑警匪一家，涉及包庇喇。
所以話，官僚靠得住，豬乸會上樹。港府對佔中行動無奈，對旺角暴亂無能，對南亞假難民無符，市民對住呢個「三無」政府，除咗自保之外，仲可以靠邊個？睇嚟今時今日唔只要重組「更練團」，大家最好學埋自衞術，以防萬一吖！