曾幾何時，香港以「好客之都」贏盡旅客口碑，再以「購物天堂」俘虜世界各地旅客嘅心，且香港美食亦名聞遐邇，可是，如今所有美譽都隨驅蝗趕客去。
本報以「訪港內地團斷崖式暴跌」一語道破本港旅遊和零售業進入低谷。沒有最低，只有更低。
講起就真係淒涼兼辛酸，內地訪港旅團由去年底每月逾九千團銳減至今年一月嘅三千多團，工會對五一假期報團情況悲觀，認為如果有去年一成團數已偷笑。難怪導遊同領隊感到生計受威脅，收入大減三分之二，唔心慌就有鬼咯！
呢，有工會希望港府推出救亡措施，增加旅遊景點，而立法會一眾激進泛民唔好郁吓就拉布，應確保高鐵和港珠澳大橋盡快落成通車接通內地，讓更多旅客方便來港喎！對焦錯誤，講乜都嘥氣。
唉！呢啲都係「堅離地」嘅想法，香港呢個「福地」，其實深究之，冇神經政府都有份一手摧毀！點解咁講，大家睇到政府對付假難民、南亞兵團有冇「治亂世用重典」？有冇真正加速處理假難民嘅「酷刑聲請」？有冇積極去處理上水水貨客逼爆上水嘅問題？
冇！我真係見唔到！睇吓元朗淪為南亞兵團犯罪之重災區，治安日益惡化，有居民擔憂自身安危，叫警方加派便衣巡視；有區議員更認為需倣效古時新界鄉村，自組「更練團」或「護送隊」！內地有順口溜：辛辛苦苦幾十年，一朝回到解放前。今香港有：慶賀回歸十幾年，一朝回到英治前。「何年史筆書真相，幾省農家得小休？」懷念歲月靜好的鄉居，懷念元朗還有種米稻香的年代，思之不禁神傷。
活在「法治」時代，元朗區居民竟然「出街都好驚」，仲話要自組「更練團」，你話係唔係笑話？設想孔夫子若居於元朗，亦必仰天長嘆要「乘桴浮於海」矣！