正所謂禁微者易，救末者難，古人一啲都冇講錯。好似假難民問題咁吖，就係因為港府一直無知無覺，闊佬懶理，先至令問題不斷惡化，卒之淪為治安毒瘤，搞到香港七國咁亂。
經過本報發揮第四權功能，鍥而不捨連環揭發假難民帶來嘅各種問題及亂象，港府終於有番少少知覺，向立法會建議修訂《入境（未獲授權進境者）令》，將偷運巴基斯坦、孟加拉和印度等國家非法入境者嘅刑罰，增加到最高監禁十四年及罰款五百萬元。保安局局長黎棟國係咁講嘅，根據現行法例，當局只能以「協助或教唆非法入境或非法留港」嘅罪名檢控蛇頭，最高刑罰係監禁三年及罰款二萬五千元，相對於人蛇集團嘅豐厚利潤，阻嚇力明顯不足。
咁又係吖，蛇頭向南亞人蛇收取嘅偷渡費每個閒閒地幾萬元，反觀法例規定嘅最高罰款只有區區二萬五千元，而且經常獲得司法機構輕放，何來有阻嚇力呢？唔怪得非華裔非法入境者愈來愈多，二○一一年只有五百四十七人，舊年飆升至三千八百一十九人，短短幾年就增加六倍，問你怕未。
即係咁，治亂世用重典，當局建議提高刑罰打擊人蛇，本來無可厚非，可惜假難民問題早已尾大不掉，淨係靠提高刑罰根本止唔到咳。更何況，對於假難民嚟講，香港監獄好食好住，唔止有人工收，仲可以免費醫病，而且有符合宗教信仰嘅餐單，照顧無微不至，唔少假難民嚟香港博坐監，提高刑罰又點會嚇到佢哋吖。
正如古人話齋，治病必求於本，小修小補解決唔到問題，打擊人蛇始終要從根本做起。好簡單，退出聯合國《禁止酷刑公約》咪就係治本之道囉，港府有冇勇氣及決心吖？退而求其次，就算香港短期內冇可能退出公約，設立禁閉營亦係可行之道，最低限度可以消除經濟誘因，假難民冇咁容易搵快錢咯喎，自然唔會再蜂擁來港，唔通港府連咁嘅道理都唔明？
嗱，唔好又畀人睇死吖，當局話就話應承研究設立禁閉營，但根據港產官僚一貫拖拖拉拉嘅作風，隨時要研究幾年都似，到時香港可能已被假難民踩沉咯。唔係誇張（口架），尋日深水埗區議會討論假難民問題，有區議員指假難民犯案纍纍，造成嚴重嘅治安問題，淨係本月深水埗就發生兩宗南亞漢自相殘殺事件。區議員強烈要求當局嚴厲打擊，並盡快檢討酷刑聲請機制。
冇錯嘞，假難民遍地開花，港九新界相繼淪陷，搞到神憎鬼厭，市民忍無可忍，如果港府繼續敷衍了事，得過且過，遲早引火自焚嘅咋！