有人話家陣嘅內地模特兒個個都以性感示人，係就係外表火辣令人心動，但係講到內涵就冇乜囉。顏淺淺就唔同喇，佢不但擁有如花美貌，更有一副前凸後趷嘅索爆身材，對藝術有深入嘅研究，絕對係一位才色兼備嘅模特兒。
模特兒只係識得賣弄身材嘅花瓶？22歲顏淺淺肯定唔係！出道一年多嘅佢，論外形絕對勝任模特兒工作有餘，事關佢喺鏡頭前識得展現魅力，除咗玲瓏浮凸嘅身體曲線外，更散發出一種純情美態。事實上，佢每次拍攝寫真都唔會好似一般模特兒咁濃妝艷抹，喜歡以淡妝示人，憑住呢種清純氣質，令佢甫出道備受注目。
不過所謂純情，只不過係鏡頭前嘅包裝，有同佢合作過嘅攝影師表示，鏡頭後嘅淺淺其實係一個活潑得嚟，性感又大膽嘅少女，最愛整古做怪，令工作氣氛相當熱鬧，而呢個先至係淺淺嘅真本性！
自出道以嚟，淺淺推出過性感寫真集，又以車模身份喺車展上亮相。而佢除咗擁有令人心動嘅外形，內涵亦值得大家欣賞。畢業於湖南第一師範學院美術系嘅佢，擅長美學鑑賞，強項係繪畫國畫，果真係個才色兼備嘅美人兒。
咁點解淺淺唔去當老師，反而做咗模特兒呢？之唔係性格活潑好動嘅佢，覺得刻板嘅教育工作並唔適合佢囉！此外，佢表演欲強，除咗喜歡喺鏡頭前擺甫士外，仲好鍾意唱歌，唱功仲唔錯，經常喺朋友間展現歌喉，閒時又會作曲，故此佢希望以模特兒作為踏腳石，為未來進軍樂壇鋪路。
現時專注於模特兒工作嘅佢，按道理應該學似其他模特兒咁，積極經營個人微博增加多啲粉絲同人氣。不過對淺淺嚟講，原來經營微博係一件相當困難嘅工作，佢解釋由於冇分享生活習慣嘅關係，令佢唔知講乜嘢好，亦因為咁而失去唔少粉絲。計我話係啲人唔識欣賞阿妹啫，其實佢經常分享詩詞，例如「與君駕凌初相識，猶如潘瀟故人歸。與人爭天下為私，誰人爭萬代專祠。」真係冇幾多個模特兒咁有文學修養o架！此外，佢有時會分享廚藝，出嚟嘅製成品相當唔錯，可謂色香味俱全，如此一位出得廳堂，入得廚房又有內涵嘅索女，有邊個男人會唔鍾意呢？
簡介：喜歡以淡妝示人嘅顏淺淺，表現出與別不同嘅親和力，配合迷人美態同氣質，甚討人歡喜，最重要係佢呢種類型嘅模特兒，喺現今模特兒界相當少見，難怪佢未來嘅發展同表現，備受大家期待。
網址：http://weibo.com/u/5453995302
出生地：湖南長沙
身高：168cm
三圍：34、23、34
撰文：魂