港鐵現時有多項工程進行中，以增加鐵路覆蓋網絡，港鐵主席馬時亨（肥亨）尋日出席樹仁大學論壇時，就被學生問會否將港鐵延伸至位處山上嘅樹仁大學，方便一班學生。肥亨就話唔排除有咁嘅一日，更把握機會說教，同學生講有夢想就有可能，仲話以前讀香港大學都無諗過會有鐵路連接啦！
曾進入官場嘅肥亨當然有唔少經驗可以分享，而佢當時敢於放下身段，鞠躬謝罪嘅事迹更惹起現場同學好奇。肥亨話，鞠躬唔係大問題，最緊要可以平息怨氣，仲教路要着重溝通以解決矛盾，透露自己正因為溝通得宜先可以游走建制同泛民之間。
肥亨喺論壇上都有講唔少港鐵營運事宜，包括政府以股息資助市民交通費嘅「藏息於民」建議，又指港鐵董事局會盡快討論提前檢討可加可減票價機制建議，機制作出任何調整前都會聆聽各方意見。