政情：貴價「長壽水」 無緣美食活動
繼早前潮州節活動好評如潮後，六大社團包括香港梅州聯會、香港僑界社團聯會、香港福建社團聯會、香港廣西社團聯會、 香港廣東社團總會及香港潮屬社團總會，將於本周六起一連六日於維園舉行大型戶外活動「賞心樂食Together」，讓市民品嘗家鄉地道美食及觀看傳統文化表演。卓妮打聽到，原來活動仲有諗過請大家飲廣西「長壽水」，但最終放棄。
講起活動籌備工作時，廣西社團總會常務理事洪响堂就話，廣西有個長壽村，當地人話因為飲村內嘅水長大，所以特別長壽，佢都有諗過帶嚟香港試吓。不過，一問之下原來「長壽水」要七十五元一支，佢就覺得唔多值，所以決定放棄長壽水。
陳幼南笑言欖菜亦延壽
香港潮屬社團總會主席陳幼南話，佢爸爸最愛食欖菜，現時已九十多歲，一樣咁長壽，笑言不如整個長壽欖菜牌子賣仲好喎。活動總統籌鄭敬凱及總會常董方平預告，大會屆時會派發二萬隻功夫茶杯，市民可試飲單叢茶消滯，同場仲會有客家黃酒豬腳薑、廣西小香豬及正宗滷水鵝等美食以低於市價出售。