政情：梁繼昌倡設紅燈區遭拒
本港過去五年逾期居留及非法入境者從事賣淫被捕嘅個案有持續上升趨勢，去年就有四千五百多人被捕，較一一年多一成七。尋日立法會保安事務委員會討論打擊非法賣淫活動嘅政策及措施，會計界議員梁繼昌（Kenneth）建議香港倣效外國設立紅燈區，仲話呢個先至係治本嘅方法。不過，保安局官員就以目前無需要為由婉拒建議。
Kenneth喺會上話，如果設立紅燈區，所有活動都喺區內發生，話唔定對本港旅遊業都係好好嘅刺激。佢仲話，賣淫活動事情發生咗數以千年，可能甚至幾萬年，都未有停止，所以大家都應該面對現實喎。
不過，保安局官員就話，即使設立紅燈區，根據外國經驗都唔係Kenneth所講咁簡單，一樣有黑社會活動，如勒索及未成年少女被操控賣淫等，而且設立紅燈區會引起爭議，因為唔係每個人都想紅燈區設喺自己居住嘅地方。話時話，如果真係設個紅燈區喺Kenneth屋企附近，佢又制唔制呢？