財政預算案二讀今日再度上演，四年前開始，激進泛民主派都會透過提出修正案「拉布」，去年共提出逾三千九百項修正案，屬多年之冠。不過，今年修正案數字就大減近半，立法會秘書處尋日截止遞交提交修正案，只有二千一百六十九項，關鍵係社民連梁國雄（長毛）大減逾半修正案。唔通長毛都覺得預算案關乎民生，驚拉布與民為敵？
其實近年拉布逐漸變成「例行公事」，好似長毛去年提交三千三百項修正案，但今年只提出一千五百項。社民連副主席黃浩銘解釋，去年立法會主席曾鈺成以長毛提議的削減官員及部門開支半年及一年，是重複及瑣碎無聊為由，將修正案大減至六百項。所以今年佢哋只提削減一年開支，主席亦唔可以話係瑣碎無聊。
至於人民力量「大舊」陳偉業及「慢必」陳志全就分別提交二百六十項及二百項修正案，只是各較去年多幾十項；而獨立黃毓民亦提百幾項。此外，其他泛民黨派只提交幾項至幾十項不等，主要係要求削減官員年薪。有分析指，由於選舉臨近，拉布太耐反而分唔到身落區拉票，加上就預算案拉布等於阻人開飯，量班泛民都唔敢做得咁過分。
卓妮