中環出更：博愛連串盛事 陳李妮身負重任
博愛醫院董事局早前假洲際酒店舉行換屆就職典禮，新任主席陳李妮（Lily）接替原主席譚姜美珠做「揸弗人」。Lily話，今年係博愛醫院成立九十七年，一百周年大日子已進入倒數階段，所以董事局決定成立一百周年籌備委員會，由Lily兼任首屆主席。咁啱博愛興建中嘅全亞洲最大安老院亦將於一百周年落成啟用，故同時成立「博愛藍地安老院舍拓展基金」，齊齊為三年後嘅盛事做準備。
Lily甫上任即要肩負兩大重任，認真唔講得笑，所以佢率先向基金捐出二百萬元，董事局成員亦都熱心捐助，一星期內即籌到四百萬元，難怪Lily好開心，仲話博愛所以有今日嘅成績，全賴同仁上下一心。
李柏成着緊安老服務
同場仲有副主席李柏成（Jim）及簡陳擷霞，Jim今屆做博愛旗下安老服務委員會主席，可以話係各項社會服務中嘅重要一環。Jim話安老服務確係好重要，特別係藍地安老院進行得如火如荼，好多工作要做，好彩有簡太拍住做副主席。升呢做副主席嘅林群就笑言，做副主席後變得好忙，就職當日就簽咗二、三十個名，但做善事好開心，忙啲無所謂喇！
重返博愛做總理嘅縱橫遊執董袁振寧（CN）都有到場。近年香港人興起買日本樓投資，對日本市場十分熟悉嘅CN就話，日本樓最抵買嘅時候已過。以滑雪聖地北海道二世古為例，一開門即見滑雪場嘅住宅每呎已升至一萬元，比低谷時升番三、四倍，佢都錯過入貨時機喎。
卓妮