考考港產官僚一個常識題︰除咗中國之外，全世界有幾多國家人口過億？唔好嘥時間嘞，答案係有十一個之多，當中包括印度、巴基斯坦同孟加拉呢啲南亞國家。印度人口就嚟爬中國頭唔在講，巴基斯坦同孟加拉亦分別有一億八千萬同一億五千萬人，都咪話唔誇張！
點解功夫茶會出呢條題呢？聰明嘅讀者肯定知道，印、巴、孟唔單止係人口大國，仲係偷渡香港人蛇嘅主要來源地，三國人口加埋超過十六億，唔好話萬分之一，即使十萬分之一偷渡來港，香港都陸沉喇。港府話會增加人手加快人蛇處理速度喎，咪玩啦，有數得計，免遣返聲請嘅積壓個案已多達一萬一千多宗，即使入境處本年度增加八十三人處理，一年亦只能完成三千宗個案，遠遠追唔上人蛇增加速度。學古人話齋，人手也有涯，而人蛇也無涯，以有涯隨無涯，殆矣！莫講話增加區區八十幾人，即使全港十六萬公務員「夫添」上陣都一樣搞唔掂嘅咋！
所以話啫，香港要根本解決人蛇問題，只有一個方法，就係退出聯合國《禁止酷刑公約》，防止酷刑申請機制被濫用。可惜吖，港府假仁假義，闊佬懶理，導致問題愈演愈烈，只係因為東方報業集團近年鍥而不捨踢爆假難民禍港真相，引發社會關注，港府喺民意壓力下先至急急補鑊嘅咋。最離譜嘅係，港府補鑊都補到唔湯唔水，做啲唔做啲，選擇性聆聽民意，問你點頂。「東方報業民意調查」顯示，一半受訪市民撐香港盡快退出禁止酷刑公約，亦有唔少人認為應重設難民營，面對滔滔民意，港府唔係置若罔聞，就係含糊其辭，坐視問題繼續惡化，你話係咪與民為敵吖。
即係咁，就算退出聯合國公約茲事體大，又要由中央出面，一時三刻未必做得到，都唔代表港府可以無所作為o架嘛。特別係重設禁閉式難民營，完全可以由港府自行決定，加上港府之前有管理越南難民營嘅經驗，照計完全冇難度，點解拖到依家都唔做呢？
係人都知，集中管理難民既可以減少對社區嘅滋擾，又可以斷絕佢哋打黑工以至黑幫僱傭兵嘅財路，阻嚇效果明顯，何樂而不為？澳洲政府夠講人權喇啩，佢哋最近拍攝廣告宣傳片並喺阿富汗等難民來源國播放，告誡當地人偷渡危險之餘，亦發出澳洲唔再歡迎難民嘅訊息，港產官僚學吓嘢喇！
始終都係嗰句，只要精神不滑坡，辦法總比困難多。上述民調顯示，大部分受訪者批評港府漠視假難民困擾香港，根本無決心解決問題。港府被人批評「無知無覺無神經」，依家知點解喇！