政情：區議員黎梓恩搵到個平竇
新任嘅區議員陸陸續續搵到辦事處，沙田王屋區議員黎梓恩就真係好好彩，全靠義工幫忙，可以喺私樓區用四位數字租金成功租到辦事處。早前佢嘅議辦開幕，請咗部分沙田區議員出席，仲有舞獅助興。唔講唔知，原來舞獅嗰班人係佢嘅師兄弟。
開幕獲到賀 擬耍拳回「禮」
佢透露，喺一一年高考之後就去學中外周家拳，仲學埋少少舞獅。佢話以前一星期都會返兩次拳館練習，但自從做地區服務之後，就變咗兩、三個月先返一次拳館。佢仲話師傅唔會「詐型」，好體諒佢添！呢次出動埋師兄弟表演助興，真係唔話得喇！
當日亦有到場嘅沙田區議員黃學禮（阿禮）仲帶咗兩支香檳嚟做賀禮。阿禮亦透露最近終於搵到辦事處，依家就忙緊裝修，希望未來一兩個月內開幕。黎梓恩話嚟緊會抽時間練番拳，仲打算喺阿禮嘅辦事處開幕當日，耍兩套拳助興大顯身手。其實區議員平日工作都好忙，唔知黎到時會唔會冇時間練習而食言呢？遲啲就知嘞！