政情：港牛津碩士 報考DSE
依家中六生考緊中學文憑試，民主思路理事黃梓謙（Gary）係港大畢業生，及後仲攞埋獎學金去英國牛津大學修讀碩士，都算係尖子，但佢今日竟然都去考中學文憑試（DSE），因乜解究？
應戰通識科 搵導師教路
Gary今日考通識科，佢話係緣於民主思路成立「政策實驗室」，自己想接觸多啲青年人，有人話通識科教到啲學生變成激進派，亦有人話通識科靠死背書就得，既然以往冇讀過，不如試吓畀八百元考試，睇吓有幾難考，仲話舊年十一月有個學生主動幫佢報考嘅！
係咪準備充足應試先？佢竟然話「冇準備」，話搵咗啲學生傾偈。但原來佢有「撒手鐧」，就係識無綫真人騷《求愛大作戰》參加者、遵理通識導師梁俊佳（Guy），對方傳授咗幾招應試技巧畀佢咁話。至於應試場地都有講究，話說Gary中學母校喺屯門，所以佢專登揀番屯門考試，不過由於依家搬咗去港島，今朝就要搭一個鐘車先到。究竟佢最終考成點，七月就有分曉。