政情：激進新政黨 未選已開戰

傘後組織青年新政游蕙禎及梁頌恆、東九龍社區關注組陳澤滔等人出席記者會，宣布青年新政等六個傘後組織成立新選舉聯盟，以「香港民族，前途自決」作競選綱領，考慮於香港島、九龍西、九龍東及新界西派人參選，目標係籌集約三百萬元。該新聯盟又打算於五年後，即二○二一年搞香港前途自決公投，並會將香港獨立、維持一國兩制現狀等作為選項。

「香港眾志」頭炮連番甩轆

對於黃之鋒提出以十年時間推動二○四七年香港前途公投，青年新政召集人梁頌恆話，兩個組織喺公投時間表同路線圖上有分別，亦唔認為香港有十年時間作前途自決，表明依家係同時間競賽，由此觀之，似乎暗寸黃之鋒提出嘅時間表同路線圖太慢。

另一邊廂，黃之鋒等人於晚上正式宣布成立新政黨「香港眾志」，黨主席為擬於港島出選嘅學聯前秘書長羅冠聰，副主席為擬於九龍東出選嘅黎汶洛，正副秘書長分別為黃之鋒及周庭。

不過，該黨尋日頭炮活動頭頭碰着黑，首先活動原本先安排放映會，據知有關短片仍未通過電檢而難產收場；另一方面，該黨事先又冇要求傳媒要登記入場，臨場先突然話只可以安排廿名傳媒入場，而且先到先得，引來在場記者不滿，黎汶洛其後認衰道歉，承認安排唔係咁好。

言猶在耳，該黨首批單張亦錯漏百出，多名成員嘅名字均出錯，要用貼紙印上正字遮蓋「補鑊」，其中原名為葉健行嘅導演舒琪，錯寫為「舒淇」，而融樂會前總幹事王惠芬，其姓氏則寫錯為「黃」。

話時話，黃之鋒等人於頭炮活動都係咁甩轆，加上又同多個傘後組織成立嘅新選舉聯盟好似貼錯門神，唔知係咪預示未來該黨嘅命運都係崎嶇不平呢？