中環出更：做論壇嘉賓 AV仁「搵周公」
尋日有團體舉辦「溫和政治論壇」，想推廣吓乜嘢叫中間路線。個論壇搞成三粒鐘，唔少講者都係大學教授，當中有相當部分都係講溫和政治係乜，十足十大學上堂。依家大學生上堂，周不時都有人搵周公，尋日都唔例外，我哋都見唔少人放蚊，甚至疑似瞌眼瞓，包括民主黨立法會議員何俊仁（AV仁）。
遲到45分鐘
現場所見，畀面出席嘅自由黨主席鍾國斌，就連打幾個呵欠，之後行埋出去聽個電話，就疑似有事走先。同場嘅教育界議員葉建源亦疑似閉目養神咗幾次，但佢後來都有問嘢，算係咁啦。不過，講到最離譜嘅就係AV仁，佢本來係主講嘉賓之一，雖然佢負責下半節，但其他講者都一早到場，佢就足足遲咗四十五分鐘先姍姍來遲，到場後仲疑似瞌咗幾次眼瞓，唔通佢係唔夠瞓，賴床搞到遲到？
卓妮
