中環出更:圓匯回升 邱詠麒遊日仍話抵

前排日圓下跌,吸引唔少香港人去日本旅遊,但日圓匯價上周急漲,唔知有冇影響大家去日本購物嘅意欲呢?卓妮尋日喺沙田馬場見到富豪邱德根嘅孫女邱詠麒,佢就好高興咁話嚟緊下星期都會去日本東京玩。雖然日圓升咗,但似乎亦無損佢外遊興致,事關佢話就算日圓比早前高咗都好,同早幾年比嘅話都始終仲係好抵。

邱詠麒透露,每年都會去三、四次日本,佢有啲朋友仲會一年去五、六次行街掃貨添!不過佢自己去日本就好少專程掃化妝品或名牌,多數都只係食吓嘢,話特別鍾意日本啲嘢食,就算有輻射都唔驚得咁多咁話。

陳國民籲勿亂清潔抽濕機

同場仲有生產力促進局主席劉展灝、香港中華廠商聯合會副會長史立德同「家電大佬」廠商會常董陳國民。喺日本都有生意來往嘅劉展灝話,日圓匯價嘅起伏對佢哋生意上冇乜影響,皆因佢哋平日多數以美元交易,而且日貨定價相對穩定,唔似其他地方咁,個匯率升或跌時啲貨品就跟住改價,所以比較放心。

啱啱去完台灣宜蘭返港嘅史立德就話,台灣除咗空氣好同環境舒服,服務亦十分友善,慨嘆比較之下,香港喺呢方面就相形見絀,必須有所改善先可以挽救零售市道。

對於近日天氣潮濕,有唔少家電發生短路導致起火嘅報道,陳國民話香港嘅電器都經過認證同安全測試,預咗喺潮濕天氣下運作,好似啲抽濕機咁,抽到滿或者有異樣就會自動熄機。

佢唔建議用家自行胡亂清潔抽濕機,因為好多塵或污糟嘢喺機器入面,用家根本好難清理到,唔識整可能仲危險,所以最實際就係買有信用嘅牌子,唔好貪便宜買啲雜嘜電器用喎!

卓妮

第一手消息請下載on.cc東網iPhone/iPad/Android/Windows Phone Apps