港府一向吹水唔抹嘴，計劃多多，可惜眼高手低，講多過做，連打造無障礙通道嘅計劃都搞到唔湯唔水，傷殘人士障礙重重，寸步難行。
話說當局一二年大鑼大鼓推出「人人暢道通行」計劃，聲稱要增設無障礙通道設施，便利市民尤其係傷殘人士，可惜拖拖拉拉，眨吓眼過咗四年，部分設施仲係無影無蹤。好似上水太平邨連接北區醫院嘅行人天橋工程咁吖，政府部門以業權為由互相卸膊，遲遲未能增置升降機；又好似馬鞍山恒安邨街市增設無障礙斜道工程，因為業權持有人未釐定責任，一直只聞樓梯響，唔見人下來。你話嘞，連增設無障礙通道設施都要拖幾年，港產官僚仲可以做啲乜吖？
最離譜嘅係，去年工會就呢兩宗個案向平機會申訴，點知如泥牛入海，至今未有下文。難怪平機會被形容為政治花瓶，連歧視傷殘人士嘅問題都束手無策，更加冇主動去調查，咁嘅花瓶簡直係嘥氣。話時話，周一嶽擔任平機會主席三年期間，淨係掛住撐同志團體，又點會關心傷殘人士吖。
正如外國詩人話齋，坎坷嘅道路可以看出毛驢嘅耐力，患難嘅生活可以看出友誼嘅忠誠。對傷殘人士來講，坎坷嘅道路可以睇到港府嘅無能，艱難嘅生活可以看出官僚嘅混帳。增設無障礙設施係港府嘅承諾，官僚唔嗲唔吊，議而不決，佢哋究竟有冇關心傷殘人士，畫公仔唔使畫出腸喇。唔使講其他，本港復康巴士服務長期供不應求，每年都有逾萬宗電召個案被拒，就知道港產官僚幾咁麻木不仁。
可能知衰啩，港府突然表示研究推出十六項補鑊措施，話要幫助傷殘人士乘車喎，包括要求新登記嘅小巴裝設低地台樓梯及扶手、往來醫院嘅巴士採用低地台、巴士站搬遷或取消時設置凸字告示牌、港鐵車廂及月台為聽障人士安裝緊急事故資訊電子屏幕等。
即係咁，遲到好過冇到，當局肯採取補鑊措施幫助傷殘人士，總好過繼續翹埋雙手乜都唔做，問題係，港產官僚一向大隻講，好多所謂嘅惠民措施都係講完就算，今次會唔會例外仲要睇過至知。嗱，唔好畀人睇死吖，今年係立法會選舉年，出年係特首選舉年，大戰連場，爭拗多多，當局推出呢啲措施係咪為博取掌聲，抬高民望呢？
總而言之，講多無謂，食多會滯，行動最實際。如果港府真係想幫助傷殘人士，唔該先落實「人人暢道通行」計劃至講喇，連呢張開咗幾年嘅期票都未兌現，所謂十六項措施咪又係得個噏字，信佢一成，雙目失明吖！