同文曾說以前的年輕人以考大學醫科為人生目標，貪其「錢途無限」，社會地位又高，之不過老皇曆不堪再翻，與其認真讀書，不如走上街頭，你看那位黃衞兵頭頭，成績是差點，可人家因反國教一戰成名，忝為「思想家」、「國際政治領袖」行列。
黃衞兵已大個仔喇！所以不再「學民」而要組新政黨，中文叫「香港眾志」喎，網民揶揄讀起來好似「香港中箭」！組黨擸籌碼，第一件事當然就係要申請銀行戶口接受大家嘅捐款，可惜被銀行拒絕，自己先中箭，黃衞兵就話人哋「政治打壓」，而實情係政治人物開戶口受到嚴格審查係全世界都有嘅現象，有網民嘲諷佢見識少！
黃衞兵可能真係見識少，然則佢志氣大，更有「願景」，開口埋口就話佢個新黨可以為港人提供「十年希望」，老毛話「一萬年太久，只爭朝夕」，如今黃衞兵都算有耐性，「香港眾志」十年未晚，開戶收捐款，確實不需爭朝夕，由零開始積聚，又應了「小莫小於水滴，匯成大海汪洋」嘅哲理，網民話佢見識少，認真係「夏蟲不可語冰」也！
再講，黃衞兵呢位街頭戰士，組新黨接受訪問時已開始識得玩政治，佢話主張非暴力喎，又添一伏筆——「界線在變」，你話黃衞兵之所以是「思想家」，又似乎並非浪得虛名也！「香港中箭」，自己逍遙，過癮也。
再講啊，黃衞兵個新黨，英文名仲嚇鬼，據講係由一個希臘文字同一個拉丁文組成，又包含「人民」，又有「站起來」、「堅持」、「堅毅」、「抵抗」嘅元素，大有「雜花生樹，草長鶯飛」之姿，英哲培根話「知識就是力量」，有人認為更確切的譯文應為：知識就是權力！
黃衞兵經過街頭佔領實戰，長了知識，有了權力！唔畀佢開戶口收捐款，何止打壓，簡直靠害！界線在變，造反有理！